Entertainment News
ധ്യാന്‍ ശ്രീനിവാസന്‍ തിരക്കഥയെഴുതിയ പുതിയ ചിത്രം ആപ്പ് Kaise ഹോ തിയേറ്ററുകളിലെത്തിയിരിക്കുകയാണ്. ധ്യാനിനൊപ്പം അജു വര്‍ഗീസും രമേഷ് പിഷാരടിയും സൈജു കുറുപ്പുമെല്ലാം അണിനിരന്നിരക്കുന്ന ചിത്രം ഫണ്‍ പാക്കഡ് അനുഭവമാണ് നല്‍കുന്നതെന്ന് കാണികള്‍ പറയുന്നു.
മലയാളികളുടെ പ്രിയ നടനും തിരക്കഥാകൃത്തുമായ ശ്രീനിവാസന്‍ നാളുകള്‍ക്ക് ശേഷം ബിഗ് സ്‌ക്രീനിലേക്ക് എത്തിയതിലെ സന്തോഷവും പ്രേക്ഷകര്‍ പങ്കുവെക്കുന്നുണ്ട്. സൗഹൃദത്തിന്റെ പശ്ചാത്തലത്തില്‍ നര്‍മപ്രധാനമായ മൂഹൂര്‍ത്തങ്ങളുമായാണ് ചിത്രം കഥ പറയുന്നതെന്നും സോഷ്യല്‍ മീഡിയാ കമന്റുകളിലുണ്ട്.
ലൗവ് ആക്ഷന്‍ ഡ്രാമ, പ്രകാശം പരക്കട്ടേ തുടങ്ങിയ രണ്ട് ചിത്രങ്ങള്‍ക്ക് ശേഷം ധ്യാനിന്റെ തിരക്കഥയില്‍ വെള്ളിത്തിരയില്‍ എത്തുന്ന ചിത്രമാണ് 'ആപ്പ് കൈസേ ഹോ'. അച്ഛന്‍ സ്‌ക്രിപ്റ്റ് വായിച്ച് നല്ല അഭിപ്രായം പറഞ്ഞതാണ് ഈ പടവുമായി മുന്നോട്ട് പോകാനുള്ള ആത്മവിശ്വാസം നല്‍കിയതെന്ന് ധ്യാന്‍ അടുത്തിടെ പറഞ്ഞിരുന്നു.
കോമഡി വിഭാഗത്തില്‍ ഒരുങ്ങുന്ന സിനിമ നവാഗതനായ വിനയ് ജോസാണ് സംവിധാനം ചെയ്യുന്നത്. ഡി ഗ്രൂപ്പിന്റെ ബാനറില്‍ മാനുവല്‍ ക്രൂസ് ഡാര്‍വിനും, അംജതും ചേര്‍ന്ന് നിര്‍മിക്കുന്ന ചിത്രം വള്ളുവനാടന്‍ സിനിമ കമ്പനി ത്രു ആണ് തിയേറ്ററിലെത്തിക്കുന്നത്.
ജീവ ജോസഫ്, സുധീഷ്, ദിവ്യ ദര്‍ശന്‍, സഞ്ജു ശിവറാം, ജൂഡ് ആന്റണി ജോസഫ്, നവാസ് വള്ളിക്കുന്ന്, ഇടവേള ബാബു, അബിന്‍ ബിനോ, സുരഭി സന്തോഷ്, തന്‍വി റാം, വിജിത തുടങ്ങിയവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
മനു മഞ്ജിത്തും സ്വാതി ദാസും ചേര്‍ന്നൊരുക്കുന്ന വരികള്‍ക്ക് ഡോണ്‍ വിന്‍സന്റാണ് സംഗീതവും പശ്ചാത്തല സംഗീതവും ഒരുക്കുന്നുന്നത്. ഛായാഗ്രഹണം അഖില്‍ ജോര്‍ജ്, എഡിറ്റിംഗ് വിനയന്‍ എം ജെ, കലാസംവിധാനം അസീസ് കരുവാരക്കുണ്ട്. മേക്കപ്പ് വിപിന്‍ ഓമശ്ശേരി, കോസ്റ്റ്യം ഡിസൈന്‍ ഷാജി ചാലക്കുടി.പി ആര്‍ ഓ മഞ്ജു ഗോപിനാഥ് ഡിജിറ്റല്‍ മാര്‍ക്കറ്റിംഗ് : ഒബ്‌സ്‌ക്യൂറ, പബ്ലിസിറ്റി ഡിസൈന്‍ യെല്ലോ ടൂത്ത്.
Content Highlights: Dhyan Sreenivasan's Aap Kaise Ho Movie respone